Fazenettli

Fasnacht 2019

Mit eSports, UEFA und FIFA macht är e Huffe Gäld
Gschäft wie vyyli anderi, s isch em Burgener sini Wält
Au mit Frücht däät äär schynts handle, doch das duet iis wee
Die Zitrone, wo n är ussbrässt, isch unsere FCB

D Wienachtsgschicht vo miim Grosskind goot eso, y glaub y spinn
Zwei Männer as Bäärli bi dr Grippe, e Maitli und e Bueb liige drinn
S kunnt e Keenig und e Keenigin und e Drag Queen bim Stall verbyy
Dr Ochs isch e Oechsin und dr Josef derf d Leihmueter syy

S letscht Joor sinn mir zwai Muslim in Mekka im Grais ummegloffe
Är isch mer allewyl uffs Nachthemmli drampt, ha gmaint dä sigi bsoffe
No dr zäänte Rundi stinggts is, hejo mir hänn s denn gsee
S näggscht Joor göön mir statt deert aabe z Binnige in d Moschee

S wäär schön hätt me die Halle noonem Roger Federer gnennt
D TESLA-Garage liggt deert was me ass Baschi Dürr-Blatz kennt
D Ackermaa-Vorstadt wär die, wo wäg de Stolperstai kuum kasch laufe
Nur wurd me z Baasel sicher nie e Strooss noo nem Wessels daufe

Loos Hansli, muesch ai Gnepfli drugge uff däm Holzbrätt doo
Das links isch root, das rächts isch grien, es isch eifach esoo.
Wenn Du dernääbe längsch, no isch es halt scho z spoot.
Hee, bisch nümm in dr Hääfelischuel, bisch für d SVP im Groosse Root

Si bschisse bi de Bostauto – „Jaa, chly stinke muess es!“
Dr Maudet fliegt noo Abu Dhabi – „Ja chly stinke muess es!“
„Ja chly stinke muess es!“, heschs bi dr Raiffiise au gsee
Joo vom Kopf här stinggt dr Fisch au bi dr BVB

E Mäzen hett unserer Stadt e Bild vom Picasso gschänggt
Die Figur sig schyynts e Frau, joo wär hätt das dänggt
Erscht wenn s drüllsch und draisch, no merksches gly
Die wo doo Modäll gstande isch, ka numme d Ackermaa sii

„Dr Bnöö vom mim Bus het kai Brofil“, funggt dr Schofföör zimligg rääs
Doch d BVB Zentrale schimpft: „Mach kai Gschiss wäg soome Kääs!“
Jetz bifäält d Laitstell doch de Schofföör a si s Stroossegsetz verletze
Mir finde me sött anstatt dä Bnöö - zerscht dr Chef ersetze

Baasel-Stadt wott nit ass unsri Spitäler fusioniere
Mer wäi luege sääge d Rammel – mir wäis duurestiere
S isch wurscht ob s Unispittel zämmeschafft mit em Bruederholz deert oobe
Will d Döggter verstoosch jo ainewääg nit, es sinn jo alles Schwoobe

Dr Strelli hett mit ere Furzidee doo kaini Juniore gfunde
Drum hoolt är jetz jungi Fakir deert in Indie unde
Die stelle e hailigi Kue in unser Gool – das finde mir nö nätt
Und in aigene Stroofruum lege si e groosses Naagelbrätt.


Ain stimmt joo und maint drby nai und dr zwait isch nooni baraad.
Ain hoggt syt zwei Stund im Schiesser, ain uff em Määrtblatz bim Kopfsalat
Ain verstoot nit Baaseldytsch, ain het kai Aanig vo de Keschte
Löönd doch mee Buschi in Groosse Root, das Blääre verstöön si no am beschte

Im St. Jakob-Park gits scho ne Wyyli Freiliechtspiil statt Schutte
Dr Streller isch die Schööni, dr Karli as Byyscht e Pflutte
Dr Zuffi spiilt e Katz uss Cats, dr Frey as Willhelm Tell in Zoggeli
Duur s Stadion schwäbt dr Burgener - as Phantoom vom Joggeli