Willi & Walti 2019
Ii drugg mi iine, ha no platz, scho stoot mir ain uff d‘ Schue
links vo mir, schnuuderet ain, dä hindedraa isch zue
vor mir stinggts, no Currywurscht, uss dämm ykaufskaare
das machi nümm im Achterdramm vo Weil uff Basel faare
Äärdmännli, sinn die härzige Viicher, wo mir alli kenne
Sie dien, wenns Ihne z gföörlig wird, in‘d Löcher iine renne
mir kenne das, do z’Basel guet, s’isch jedi Wuch z‘gsee
kunnt dr gegner, e bitz z‘noch, gsesch kein vom FCB
I ha angscht, i zittere, mi Doggter duet zueloose
I bi verschwitzt, mir goots nitt guet, i schiss mr fascht in d Hose
so goots mir, e jede daag, wenn ich in d’Stadt muess faare
är meint es wird nur besser muesch dä Wessels iiberchaare
In de Bärge, und im Zolli, sinn mir scho am sueche
mir luege in dr ganze Schwyz, du hörsch uns nur no flueche
die ganzi Wält, schnurrt vo dämm, dä ka doch nitt verschwinde
oder wüsse dir wo mir dä Doppeladler finde
Alli chlöne wäg dr Jugend, wo überall duet fääle
au in dr Politik, ..yyr miend halt jungi wääle
im Rothuus z’Basel, bruuchts jetz ändlig, löönd euch jo nitt lumpe
e Sitzigszimmer, wo me au ka muettermilch abpumpe
Jö wie härzig, für die Zircher, jetzt duets ändlig klappe
es gitt e glaine, „Tschuutiplatz“, si könne’s knapp berappe
die bruche dört, statt Würschtlistand, das isch uns allne klar
e fiirwärkabschussrampe und e bäsebollschlegerbar
In Basel gitts, wie sunscht niene, soviil neys zum gsee
doorum chömme, mee Turischte, wägere Glanzidee
in kainere Stadt, duesch das griege, doo muesch lang druff warte
zum Drämmlibillett, gitts e Helm, und e Baustellkaarte
Jetzt bini, am verzwiifle was soll ich numme mache
ich hör wenn ich due Stäge laufe, miini Hüftglängg grache
d‘ Fusion isch platzt, vo de Spitäler, jetzt heissts ussprobiere
die rächts in Lieschtel und die linggi z’Basel operiere
Mi Auto faart ellei mi Oofe sait was ich soll bagge
bim uusegoo gitts Alarm, ich ha die falschi Jagge
die digitali Wält vo hütt interessiert kai Sau
waas ich wenn muess mache, sait sitt Joore mini Frau
Im Klingeli, wirsch aabegschtoche, und an Boode gschlaage
In dr Staine, wirsch bespuckt, und s’klaut dr ain dr Waage
d’Polizei isch nooni döört, die sinn no lang nitt doo
dr Tesla duet de Schugger Ihres Änglisch nitt verschtoo