Staubwolgge Fasnacht 2018

Dr Trump isch Dütsche, das merggsch glyy,
d Merkel könnt si Schweschter syy.
Si Babbe het e Manta ghaa,
e Fuggsschwanz an dr Antenne draa.
Nur dr Trump dää armi Dropf,
drait dr Fuggsschwanz uff em Kopf.

Dr Prinz Harry het si liebi gfunde,
und wills dr Queen erfreut bekunde.
Wo äär duet iire Name lalle,
isch d Queen denn grad in Ohnmacht gfalle.
Äär sait denn no, wo syy veraisst,
dass si Markle und nit Merkel haisst.

Im Fuessball duets au Schwuuli haa,
drum lauft dää Film vo de Young Boys aa.
Tabälleerschte duesch es ztschegge,
sii liebe Freystöös und au s Degge.
Dää Film, dää isch jetzt momentan,
dr Kinohit im Vatikan.

Uss dr Uni in hochem Booge,
isch e Feminischtin gflooge.
Genderstudie het sii doziert
und d Männer dert verbal kaschtriert.
Doch lesbisch sii, het doo kai wärt,
au derte stoot e Frau am Härd.

Dief in dr EU funggt dr Junker,
uus sim zwaite Wältkrieg Bungger.
Wie e Biebli duet dää zwänge
und will d Schwiiz mit drohe dränge.
Statt d Leuthard bruuchts e rächte Maa,
drum muess d Martullo Blocher draa.

Düü dää doo,
s Boschtauto,
fahrt in Drägg,
s Gäld isch wägg.

Liebi Lüt mir diens euch saage,
au mir dien als e Burka traage.
Bisch vor Raub und Gsindel gschützt,
kunsch sicher Haim, wells ebe nützt,.
Doch wenn emol e Furz muesch loo,
denn goosch dört drunter fascht K.O.

E Schälledrambbere maint adrett,
ich kaa Französisch nur im Bett.
Dass sii im Elsass darf verkehre,
muess si jetzt Franzesisch lehre.
Mir wäre bi de Fahrer froh,
si wurde s Baseldytsch verstoo.

E Ministrant het proteschtiert
wo me d Hoschtie zelebriert.
Ich due kei Laib Christi ässe
als Veganer kasch s vergässe.
Dr Pfaarer sait, jetzt schluggs im nuu,
die halbi Kirche schreyt „Me too“.

Die Misswahl macht mir richtig wee,
hesch s Gfüül de muesch ne z Ässe gee.
Falschi Wimmpere, Brüschtli gspitzt,
d Fuudibagge hindere glitzt.
Do maint e Miss dass sigi d Regel,
nur s ainzig ächt sin Zeechenegel.

Dr Kim Jong un bim haimwärts goo,
macht e Brunne, das im Stoo.
Äär hed si aige Bai denn troffe,
e Wuetaafall isch nochhär gloffe.
D Korea News die hörsch jetzt brichte
d Ragette sig halt z glai zem richte.

Bädde, bädde, bädde, bädde,
flissig bädde dien die Nädde.
Die Taizé-Jugend isch sehr Nädd,
nimmt s Bööse z Basel ins Gebädd.
Doch s het nüt gnützt, es isch halt soo,
dr Wessels isch no immer doo.

Laufsch z Basel uff em Trottoir und kasch nümme wyter goo,
well s Velo vom Herr Wessels, doo im Parkverbot duet stoo.
Pletzligg isch denn aine koo, dä macht denn s‘ainzig Gscheyt,
äär hett denn das Velo paggd und in e Bauloch gheyt.

Wartesch z Basel uff e Tram, das duet aifach nit koo,
well si grad am Baue sin, sind dSchiene nimme doo.
Das Gaischtertram ins Elsass, jo das muesch jetzt grad vergässe,
usser die Regierig goht uff St.Louis go äässe.

Uff Basel sin zwai Ziircher koo, die hän doo s Lääbe gnosse,
dr ainti bi dr Bolizey, het Wattebäuschli gschosse.
Dr ander het sogar e Schwiizermaischter gschänggt bykoo
die baide sin jetzt wieder wäg do simr schuurig froooo.

Mit dr Mode kunnt dFrau Ackermaa an dLeuthard niemols dra,
Drum dängge mir, es wär doch schön, dr Morin wieder zha.
Dr Baschi Dürr mit Glatze hets ihn ächt am Kopf zfescht gjuggt,
wo dAckermaa sich buggt do hets em dHoor zem Kopf uus druggt.

Well me mit däm Wältkulturerwerb überall jetzt wirbt,
Hoffe mir, dass dBasler Fasnacht wäge däm nie stirbt.
Mir saage euch jetzt „Sali zämme“ und no kurz und knapp,
Gniesset alli dBasler Fasnacht, dört goht dBoscht jetzt ab.