Schuumschleeger 2017

E Maa mit Baart verdailt Korän, do heert me s grache,
mir stiirzen is uff dä wie dr Siigfriid uff dr Drache.
Doch unsre Kampfyysatz isch vellig iberdriibe,
däm explodiert im Sagg nur s Handy Samsung Siibe.
Ich rief denn glyych dr Bolizei,
doch die hänn Bisnisslunch, no bis am Drei.

Es glepft und gnallt und brennt, s heerrscht Therror, Grieg und Noot.
Luegsch d Daagesschau hesch s Gfyyl as d Wält glyy untergoot.
Doch me macht uns denn zem Gligg am Änd no Muet:
dr Buucheli dä zaigt is, s Wätter wiird morn guet.
Do kunnt e Windstooss und scho, zägg,
bloost s au dr Buucheli ewägg.

Wäär fiert dä Danz uff ?, s isch allem Aaschyyn aa,
nit dr Vogel Gryff, au nit dr Wildi Maa.
Nai, s isch e Schugger, är schwingt s Fuudi und dr Ranze,
und duet im Baschi uff dr Naasen ummedanze.
Zem Danze, maint e Schuggerkätzli,
wäär s Glätzli au e häärzigs Blätzli.

Stiilt ain z Araabie, haggt me däm, zägg, d Hand grad wägg.
Bim zwaite Mool sinn baidi wägg, denn hesch dr Drägg.
Kunnt denn so ain zu uns in d Schuel go Stunde nää,
muess dä dr Lehrerin sicher d Hand nimm gää.
Als Muslimfrau kenntsch dii esoo
vom Schwimme dispensiere loo.

Sii, dä vergilbt Heinoverschnitt, dr Donald Trump,
het uffem Kopf, wenn s windet, schnäll e Riisegschlamp.
Jetzt griegt är wägg syym Syteschaitel schuurig Stress,
will s Badänt uff d Fryyse gheert im Gilbert Gress.
Dä Tschuppel findsch, jetzt muesch loose,
au in syynere Underhoose.

Liebe Donald, kumm verbyy, du wirdsch perplex syy.
Mi eltischt Dochter isch wie dyyni dotaal sexy.
Y haa wie du Mylliaarde, bii n e Rampesau,
Y bii de Christoph Blocher, gäll du kennsch mi au?

Vergiss dä Christoph Blocher, loss doch dää lo syy.
Du bisch wie n ich, i gspyyr dii, Donald kumm verbyy.
Bring no di Dochter mit, uff jungi Fraue stoon i,
e ganz e liebe Gruess, di Silvio Berlusconi.
Haa Maitli bstellt Herr Presidente,
hoff dyys Hörnli isch al dente.

Dr Erdogan vom Bosporus, dä aitli Maa,
mecht sich gäärn als Waggsfiguur vereewigt haa.
Do sait d Madame Tussaud:“ joo, das sotti goo,
är kennt als Gruuselgloon grad nääbem Yygang stoo.“
Und vor im stoot, dr Waggs no haiss,
allzyt berait, syy Lieblingsgaiss.

Brivaati Faarte, Sexskandaal, s kunnt vyyles zämme,
dr Baschi Dürr het s nit im Griff, dä sott sich schämme!
As d Baasler Schmiir nit zue n is basst das isch nit neu,
drum hänn s im Schuggerwappen au dr Ziirileu.
Fir d Ziircher Schmiir wuurd, ooni z liege,
e Braitmuulfrosch im Wappe gniege.

An dr Heuwoog stoot e Muuni, ganz e faisse.
E Gaissbogg kunnt dr Gämsbärg ab mit syyne Gaisse.
Unsri Stadt wird aidgenössisch wäägem Schwinge
und dr FCBee dä schuttet z Wintersinge.
E Hooselupf, scho liggt, lueg aa do,
flach im Strooffruum dr Delgado.

E Kopfduech linggs, e Vollbaart rächts und in dr Luft,
schwäbt e Gnooblauch – Merquez – Dürüm – Kebab-Duft.
Versteen kai Wort, aa doch zem Gligg s het no zwai Schwoobe,
mir sinn im Blääsischuelhuus amne n Eltrenoobe.
Ich heer -öö und -üü und vicivic,
alles, nur kai Baaseldytsch.

Oral, das haisst durch s Muul, wird d Naarig zue sich gnoo.
Anal duet das wo nit verdaut wird uns verloo.
S git en Uusnaam vo dr Reegel, s duet is gruuse,
dr Schyssdrägg kunnt bim Trump zer Schnuuren ooben uuse.
So ainem saag ich schlicht:
Fuudigsicht.

Im Vegaaner syym Salaat liggt iibersyyrt,
e Bioschnägg, syy Häärzschlaag het me kuum no gspyyrt.
Drotz Mund- zu Mundbeootmig isch druffaabe glyy,
das Schnäggli gstoorben anre Tofuallergyy.
Au ich iss gärn vegaan, jo waisch,
am liebschte zumne Bolle Flaisch.