Staubwolgge Fasnacht 2016

 

D Frau Leuthard isch e liebi Frau,
e härzigs Lächle het si au.
Wenn si als bim härzhaft Lache,
so richtig fescht duet s Muul uffmache.
Mir stuune nur und könnte schwööre,
do meinsch de luegsch in d Gotthardrööre.

E Toni Brunner macht jetzt schlabb,
dr Blocher git dr Löffel abb.
Dää Parmelin freut sich als erscht,
dr Ogi schreyyt grad „Freude herrscht“.
So wird d SVP, es steert doch kain,
mit Bärner Röschti Stuuberain.

Orangehuut und Hängebuuse,
und s Fidle hängt halb hinde uuse.
derzue no Hoor an Bai und Bruscht,
do kriegsch doch in dr Badi Fruscht.
Drum dien mir sottige Fraue Saage,
im Eglisee kasch Burka traage..

My Frau kaan ich im Eglisee,
wäg dr Burka nimme gsee.
Denn find ich sy und nimm sy hai
und dängg no het die kurzi Bai,
sii risst dr Schleyer ab im nu,
ich haiss Minu wär bisch du?

Bi de Asylante das isch doof,
gits e Minderheit vo schwarze Schoof.
D Kinderstuube hän die verpennt,
die hän nit mini Muetter kennt.
Sii wär iine, kasch sicher syy,
mit em Deppigglopfer hindedryy.

Sii luegt en scho ganz luschtvoll aa
und längt denn ohni Rücksicht draa.
Denn paggt s en uus ganz resolut,
schmeggt denn draa, zieht an dr Hut.
Si macht en heiss und duets begriesse,
trotz WHO e Glepfer z gniesse.

Die Katholisch Kirche das findi grass,
hilft Huere in dr Oggsegass.
Damit si könne Gott begäägne,
duet me iiri Wärggzyyg säägne.
Dr Bischoff maint den kurz und glatt,
und ich hälf in dr Schützematt.

-In Basel fyyle mir uns wohl, denn doo sin mir dehai,
doch mir sin e aige Volk und s passiert so allerlai.
Zem Byschpiil hän mir neyi Drämmli, die sin doch dr Hit,
nur wenn denn uff ains warte muesch, no kunnts, oder ebbe nit.
-Die blaue Zone wo mir hän, sin doch, hools dr Gugger.
D Parggschyybe wäg dr Rächnigskunscht, s Problem fir unsri Schugger.
Bis die am Mäntig grächnet hän, eb die Zyt duet stimme,
isch als denne wieder Sunntig , denn bruuchsch die Schyybe nimme.
-Vorhär hän mir aine troffe, ganz bluetig und verschmiert,
het en ächtscht e wildi Frau, so fescht konfrontiert.
Oder het en e Seniorebandi, mit em Rollator yberfalle,
nai äär isch am Spaalebärg, yyber e Boller gfalle.
-Unseri Regierigsrööt mit und ohni Ränzli,
bi mänggem dänggsch dää het e IQ vom ne Zimmerpflänzli.
Dr ainti leggt dr Verkehr ganz lahm, dr ander bald nimm doo,
jä liebe Morin, wär soll jetzt, an all die Aaläss goo.
-Die Armuet do uff dääre Wält, dass sott me doch beände,
drum dien doch jetzt em Baselbiet, die paar Milliönli spände.
E Sozialbyytraag vom FCB, an Fischer uff dääre Ärde,
so kaa dää Zircher, do in Basel au mol Maischter wärde.
-Liebi Lyt mir sin am Änd und d Moral vo dääre Gschicht,
unter uns in Basel isch, e mängge nit ganz dicht.
Doch mir gniesse d Fasnacht jetzt, au wenn’s ringsum zämme bricht,
denn das Joor z Basel an dr Fasnacht haisst s, „Mir mache dicht“.
denn das Joor z Basel an dr Fasnacht haisst s, „Mir mache dicht“.
-Und wär s Fasnachts Sujet jetzt nit tscheggt het, muess es jetzt verstoo,
ab sofort dien mir Schwoob und Ziircher, alli dusse lo