Fazenettli Fasnacht 2016

Vo Waldeburg uff Lieschtel fiert e Schmaalspuurbaan.
Dr Rampass will e breiti Spuur in sim Grössewaan.
Nur Bildig und Kultur sin z düür fürs banggrotte Land!
Isch daas no s Baaselbiet? - Nai dasch Griecheland.

Hesch Ranzewee und wotsch im Bruederholz Di pflääge loo,
Haissts: Mir fligge numme Fiess, Si mien uff Lieschtel goo.
Dr Chef rieft us: Mir hänn kai Bett – numme Laufe hätt no gnue.
Deert sait d Schweschter Gudrun: Tut mer laid, haid hemmer zue!

S Victoria Jungfrau z Interlagge het vyyl Tradition.
S Hotel Euler z Baasel stoot an dr schönschte Dramstation.
S Röösli serviert im Ochse z Aesch waisch die mit em grosse Buuse
und im Baur au Lac in Züüri dien d FIFA Gängschter pfuuse.

D BVB kauft neui Aazaigdaafele für d Statione.
Dä Blödsinn koschtet sauvyyl Gäld, grad e baar Millione.
Döört sölle si schryybe ob är voll isch mit Rhyzenter Gugge
oder könne si im 8er au none baar alti Schachtle yynedrugge.

Im Bundesroot gits nomoll soone Wälsche nundedie,
wie dr Muurer het au dää mit Zaale schuurig Mie.
Bim Zelle vo Gweer und Handgranate kunnt dää in grööschti Not,
will s Rächne mit Promille und Oechslegraad doo nit goot.

Em Muurer hänn do letschti z Bäärn vyyli d Stimm nit gää
ainewääg het daas Dotteli d Waal sich nit lo nää.
Si Frau isch e weeneli stolz, hätt schampar uff iin Gluscht.
Äär butzt se ab: „Has im Fäärnsee scho gsait, hann hüt kää Luscht“
.
Dr Clooney und si Frau hänn in Venedig chic ghüüroote.
Was noohäär alles gloffe isch, hänn sii is nie verroote.
Nit vyyl sait si druff spööter – S isch wurscht, was sells?
Bis jetz kaan äär ämmel Kaffi mache numme froog y mii „What else?“

Für Brüssel hätti d Schwyz scho in d EU yyne selle.
Die schiggi Sommaruga het aaber nit unterschryybe welle.
Dr Junkers brobierts mit eme satte Schmutz, Sie sait, bisch nit mi Schatz!
Bass uff, Du Gnirps, waas Du do machsch isch Sex am Arbetsblatz!“

Dr Ahmed vo Damaskus hätt in en IKEA Hütte selle
und schimpft yy haa kai Blatz zem d Wasserpfyffe aanestelle.
Und uff em Dach fäält d Schüssle, ka al-Djasira nit empfange.
Dr Bättdeppig kaa yy nit ussrolle – Jää Sii, dä wär fascht wyyder gange.

Griess Gott saisch wääg de Muslim nimm, s haisst jetzt Salam Aleikum.
I saag nümm: „Hallo Schätzli!“ nai, „Allah isch grooss!“ wenn yy hai kumm.
S Hemmli mit de Eedelwiss daas isch scho lang vergässe,
Aaber im Versteggt hämmer no zwai Schwiinswürschtli gfrässe.

Ob Alki oder Psycho, beidi dien is laid.
Was underschaidet ächt die zwai, au s Comité waiss nit Bschaid.
Drby schyynts s doch rächt aifach z sii, s isch soo us unsrer Sicht:
Dr erschti isch jo aifach zue, dr zwaiti nit ganz dicht.

E mängge Bolitigger waiss nit, wenn d Zyt isch koo zem goo.
Dr Morin zem Glügg hets yygsee und goot – mir sinn so froo.
Jetz kaan äär ändligg sim Hobby nooch, mir könne daas guet begryffe,
Kaa Orgele iiebi im Münschter – äär basst guet zue dääne Pfyffe.