Spitzig Ryssblei 2018

Ych schtand mit em Goschtyym uff dr' Strooss,
no 10 Minute denn goohts loos.
Ändlig isch es wiider sowyt,
ändlig foot sy aa die scheeni Zyt.
Mir laufe loos, im Stärneschyyn,
ändlig es isch wiider Hellowyyn.

D' Hebamme Hueber Elisabett,
isch dye Hebamme wo mi uff d' Wält brocht hett.
Kuum dusse es isch nit zem saage,
hett die mir uff‘s bludde Füüdle gschlaage.
Jetz han ych, joo die hett nimm glacht,
e Aazeig wääge sexueller Beläschtigung g'macht.

Wenn's z' Basel schneit, kasch mache was wotsch,
isch dää Schnee bald nur no e bruune Pflotsch.
Wenn denn dr Babbe über d‘ Nacht,
sym Bueb soon e bruune Schneemaa macht.
Meint dää am Morge, dää han ych nit gärn,
dää seeht uss wyen e Spiiler vo Yong Bois Bärn.

Ych  froog  mi, was isch in Basel loos,
's git kei Federer Platz, kei Federer Stroos.
Kei Federer Gass, kei Federer Stääg,
kei Federer Vorstadt, kei Federer Wääg.
Do dr' für gits und das scho glyy,
e Rüü dü Wessels uff Sää Luyy.

D Frau Meier drüllt im Gundeli,
mit em Hundeli e Rundeli.
Mir wüsse jetz alli 's Gundeli,
wird nit mit eme Tunnel verbundeli.
Suscht wär d Frau Meier mit em Hundeli,
jo unter em Gundeli verschwundeli.

Jetz hänn mer e Trämli uff Weil am Rhy,
und eins diräggt uff Sää Luyy,
Ych miecht no e Schiine übere uff Gränzach,
uff Hääsige, Haltige und eini uff Lörrach.
Zum Ussglyych, ych wurds emool ussbrobiere,
kennt me d‘ Schiine in's Baselbiet demontiere.

Scho bald lauft alles nur no digidaal,
de hesch kei Waahl me nur no d’ Quaal.
Mit  unheimlig grosser Effiziänts,
forscht me noo dr' künschtlige Intelligänz.
Jetzt hänn Forscher aber, überall versteggt,
Im Baudep. au künschtlegi Dummheit enddeggt.

Wenn me Basel Stadt entwiggle wott,
denn holt me uss Lieschtel dää Lukas Ott.
Ebbis stöört mi doo e glyy,
worum muess es e Baselbieter syy?
Aber ainewääg bin ych schuurig frooh,
hett dää Tschopp nit  scho wiider e Schwoob bikoo.

Vo überall häär, joo mir händs gseeh,
hoolt me Spiiler zrugg zum FCB.
Schyynts kääme die meischte oohni Drugg,
wiider gärn zum FC Basel zrugg.
Jetz hejoo do froog ych mi,
isch dr' Odermatt nit au emool bi Basel gsii.

D Boscht, he joo es muess sich loohne,
bringe d' Boscht bald nur no mit so  Droohne.
Oder, daas wäär nit einerlei,
mit so färngschdyyrte Wäägeli zue dir hei.
Fooht ägscht jetz d' Frau Müller vo nääbedraa,
statt mit em Böschtler mit däm Waage e Verhälnis aa.

Bi dääre Abstimmig im März joo dr' noo,
stimm ich dütlig zue No Billag joo.
Oohni Gebüühre do gits nämmlig im Färnseeh,
nomee Wärbig won ych so gärn gseeh.
Nur dangg dr' Wärbig wüsse mir ganz bestimmt,
ass me bi Blooseschwechi Ollweis Ultra nimmt.

Wo z' Davos dr' Trump vor em Ueli stoot,
stellt är sich vor, Ueli Murer, Bundesroot.
Do meint dr' Trump, im Ueli wirds myys,
sorry Mister Murer ei hääf e queschtschen blyys.
Är könnt,  duet är iim in d Oore huche,
an dr' Gränze zue Mexiko no e Murer bruuche.