Zwaierlizwigger Fasnacht 2016

Jä Santiglaus jetzt bisch e alte Maa
und ich dr Blatter Sepp bi dä wo alles kaa
drumm übernim ich ab sofort di Poschte
De seisch mir aifach no was mi das wurd koschte

No aimol singt dr Streller für dr FCB
an dr Maischterfiir Schnitzelbängg ohjee
und au dr Philipp Dääge singt ai Bangg als Dangg
bis är die Pointe het hoggt är halt uff dr Bangg

Hello ich Ueli Muurer give you gärn my Hand
i welcome you in dr Regierig vo däm Land
zum Glügg bisch Du Guy Parmelin jetzt Bundesroot
Du bisch dr Ainzig wo mi Änglisch no verstoot

Uffsmol umstellt mi am Rhy e ganzi Grubbe
das isch e Yysatz vo dr Ziircher Bombedrubbe
die händ kai Aanig dass das gar kai Bombe isch
und händ iin gsprängt mi arme Wiggelfisch

Die neue Smiley Daafle kasch dr z Baasel spaare
die lache numme wenn De langsam kunnsch go zfaare
faarsch me als 30 kunnt e Gsicht do gheisch voll duure
so hässig luegt doch nur im Wessels siini Schnuure

E Flüchtling wätteret wo kasch denn hüt no aane
Schweede Ööstriich Dütschland schliesse bald dr Haane
und gosch ins Baaselbiet dört liidisch Höllequaale
die händ jo gar kai Gäld und wänd das mir no zaale

Ich bi dr Laggs vom Haafebeggi zwai
dr George und ich sind jo do dehai
jetzt muess mi Frau im Beggi z hinderscht laiche
solang die Schwimmer dr ganzi Rhyy versaiche

Dangg neuem Tablet könne d Schugger pauseloos
dr ganzi Daag mee Buesse schriibe uff dr Stroos
mit däm Systeem Baschi Düür duesch iberdriibe
Du hesch nit ai Schugger wo so schnäll kaa schriibe

Mir mache dicht und diend es isch nümm zum Lache
halt bim Hieber z Gränzach Kommissione mache
und Ain am Uusgang het uns für zwai Euro zää
e Baasler Faasnachts Blaggette welle gää

Mir roote Diir wenn Du so richtig fescht verstopft bisch
ass De ganz fescht druggsch bis es unde off isch
und wenn s denn nit uusekunnt dien mir Dir schwööre
isch es Zyt für Di jetzt bruuchsch e zwaiti Rööre

Elf glaini Fuessballspieler hogge uff dr Bangg
si luege zue bim Fuessballspiile Kaine macht e Wangg
Bi zää glaine Fuessballspieler isch dr Klose Timm
är hofft in Ängland siigi s Bängglihogge nümm so schlimm
Nüün glaini Fuessballspieler bim Drmic laufts esoo
wenn äär denn sott zum Yysatz koo isch är nümme doo
Acht glaini Fuessballspiiler Aine macht e Switsch
äär wott halt dr Grööschti si tschau Kuzmanovic
Siibe glaini Fuessballspieler Ain dien si nüüme finde
bis hüt kaa dr Mechmedi siini Schue nit sälber binde
Säggs glaini Fuessballspieler Aim isch s nümm so wool
voor jedem Schuss froggt dr Gashi hallo wo isch s Gool
Fünf glaini Fuessballspieler Ain ka nit lang schutte
d Friise vom Behrami hebt höggschtens zwai Minute
Vier glaini Fuessballspiiler sitze uff dr Bangg
dr Inler isch jetzt nümme Käpten ändlig Gott sei Dangg
Vier glaini Fuessballspiiler bim Stocker duets grad schälle
jetzt isch Zyt uff dr Bangg für d LaOla Wälle
Drei glaini Fuessballspieler Ain haisst Fabian Schäär
im Dütsche woot äär gross go schutte joo joo woohäär
Zwai glaini Fuessballspieler dr Fischer an dr Bande
schreit Kakitani gang jetzt iine är hets nie verstande
Ai glaine Fuessballspieler kennt e jeedi Bangg
uffsmol dörf dä Shakiri spiile isch dä Drääner grangg
D Moraal isch wenn e Fuessballclub Di mit Gäld wott logge
lueg immer zerscht d Ersatzbangg aa ischs dört bequeem zum Hogge