s' spitzig Ryssblei 2016

D' Frau Meier drüllt im Gundeli,
iiri Rundeli mit em Hundeli.
Mänggmool drüllt sy die Rundeli,
jetz im Stüggi Center undeli.
Deert isch sy mit em Hundeli,
meischtens 's einzig Kundeli.

Im Emmidaal hett me unscheniert,
e emmidaaler Kueh manipuliert.
Joo me hett's schyynts ussprobiert,
und dääre die VW Software installiert.
Jetz sinn, wenn's umm's Schisse goot,
d' Abgaaswärt besser wenn sy stoot

An de Prässekonferänze, joo dr' noo,
han ych dää Sousa aifach nit kenne verstoo.
Sy Änglisch, daas saag em hindedryy,
deerft e weeneli änglischer syy.
Ych glaub dr' FCB will das duurezieh,
ych ha mit dr Sprooch vom Neue die grösseri Mieh

Statt die 57 Kilo Kokain z' verbrenne,
hätt ych e Idee was mer besser mache kenne.
Jeede Basler darf sich, am Marge frieh,
Ei, zwei Linie yynezieh,
Mit dämm feine Stoff im Maage,
wurtsch sogar die Sibel Aslan vertraage.

Dr' Toni will uss dr' Parteileitig zieh,
är wett zrugg in Stall und zue de Kieh.
Dr' Blocher findet daas nit guet,
und nimmgt doorum au sy Huet.
Är findet dä Ruggtritt vom Tooneli schlächt,
jetz isch dää wiider Buur und nimm sy Knächt

E Dail vo de Bolizischte macht's gar nit schlächt,
e Dail vo de Bolizischte sin sicher rächt.
E Dail vo de Bolizischte maches guet,
e Dail vo de Bolizischte die hänn Muet,
Und en andere Dail dä isch dr' für,
Zimmlig "Dürr"

Wotsch in's Kino und wirt's zyddlig gnabb.
fahrt meischtens graad dr' Säxer ab.
Sett'sch pinggtlig richtig Bahnhof starte,
muesch eewig uff dää Zweier warte.
Und wotsch in Marktkauf bi Gleihyynige unde,
kunnt dert e 8er alli 4 Sekunde.

'S Theater griegt,
ir wärdet's gsee,
vo de Baselbieter bald kei Batze mee.
Sy mien doorum aa foo spaare,
und 's Programm schuurig aabefaahre.
Jetze längts drumm soo am Änd,
graad no fir dr Bättelstudänt.
Der eingebildete Kranke wurd no basse,
do zaahlt d' Helfti d Granggekasse.
Und denn wurts au ohni zwänge,
fir d' Dreigrasehe Opere länge.
Dr Raub vo de Sabinerinne erfillt au sy Zwägg,
denn wäre die Sabinerinne scho emool e wägg.
Au dr' verbrocheni Krueg dää kennt me gää,
well me doo e kabuttige Grueg ka nää.
Und me kennt bim Schwaanesee, he joo,
statt däm Schwaan en Äntli stärbe loo.
Doch spaare kennt me glaub am meischte,
Wenn mer ys 's Theater mit em Baselbiet nimm leischte